DEBAK, 22 Mei: Urung 2,183 iku penerima ari menua Betong udah ngasaika pemaik ari bantu sepenyampau RM218,300 dibaruh Program ‘Sejambak Kasih’ Gawai Dayak 2024.
Sapit Menteri Pemansang Indu, Anak Mit enggau Komuniti Sarawak Datuk Mohd Razi Sitam madah ba taun tu lebih RM2.6 juta deka diagih ngagai 26, 618 iku penerima ba selampur Sarawak.
“Sehari tu ba Rumah Bazil Teraie Debak bisi 2,183 iku deka nerima bantu nengah Program Sejambak Kasih Gawai Dayak 2024.
“Nyadi ungkup selampur Sarawak program tu deka meri pemaik ngagai 26, 618 iku penerima,” ku iya.
Iya mansutka jaku nya rambau Program Sejambak Kasih Gawai Dayak 2024 dipenyadika Sapit Premier Sarawak Datuk Amar Douglas Uggah Embas di Rumah Panjai Basil Teraie, empai lama.
Ku iya, program nya sebaka enggau Program Sejambak Kasih Hari Raya Aidilfitri enggau Taun Baru China betuju dikena ngelempungka tating belanja ngagai raban ke kurang penatai pemisi ngintu pengerami.
Ku terang Razi kenyau ari bulan Januari nyentuk April 2024 lebih RM6 juta bantu ninting bulan udah diberi Opis Pengintu Pengelantang Pendiau Raban Bansa Pampang Betong ngagai 4,516 iku penerima.-TVS
