DEBAK, 22 Mei: Karnival Wellbest Sarawak 2024 ti deka diatur ba Dataran Sibu Fasa Dua berengkah 24 nyentuk 26 Mei tu nyaran digulu 24, 000 temuai.
Sapit Menteri Pemansang Indu, Anak Mit enggau Komuniti Sarawak Datuk Mohd Razi Sitam madah, karnival pengelama tiga hari nya deka ngempuruka urung 109 iku pedagang wellbest ari selampur Sarawak.
“Kitai ngandal pengerami deka digulu urung 24, 000 iku temuai lalu bemacham aktiviti udah dilanggur sepanjai pengerami baka Fun Run, eksibisyen enggau pengawa bejual nitih rega ke patut.
“Semua sida ke bedagang tu endang raban ke bisi dibantu Opis Pengintu Pengelantang Pendiau Raban Bansa Sarawak sereta udah nerima latih sereta kus nyadi pedagang dalam bedagangka produk diri empu,” ku iya.
Razi mansutka pekara nya pengudah tembu Program Sejambak Kasih Gawai Dayak Renggat Betong 2024 ditu empai lama.
Ku tandu iya, karnival diatur Opis Menteri Pemansang Orang Indu, Anak Mit enggau Pengelantang Komuniti dikemujur nengah Opis Pengintu Pengelantang Raban Bansa (JKM) Sarawak nyadi pantar dikena ngempuruka pedagang wellbest di Sarawak seraya mandangka produk sida.
Beduduk ari nya, Razi nesau mensia mayuh ke diau besemak sampal datai ngerichahka pengerami nya dikena mandangka sukung ngagai bala pedagang wellbest ke udah dibantu JKM.-TVS
