BETONG, 18 Mei: Pengelantang komuniti pupu bansa enggau pengarap endang seruran dikenatika bala pengari rayat Gabungan Parti Sarawak (GPS) ba baruh iring Premier Sarawak, Datuk Patinggi Tan Sri Abang Johari Tun Openg, nyengkaum perayat ke mendam di menua ulu enggau menua pesisir.
Sapit Menteri Nembiak, Lumba enggau Main sereta Pemansang Pedagang Sarawak, Dato Gerald Rentap Jabu madahka, sukung ti diberi rayat mih ke nyadi pengering enggau pengeransing sida (pengari rayat) meri bantu sereta terus chakah mai pemansang.
“Aku meri bantu enda ngira sekalika komuniti Iban, China tauka Melayu.
“Laban semua sigi diberi perati ngambika kita enda tinggal ari perayat ba sitak bukai, ukai semina ninga enggau meda ngena mata aja,” ku iya madah rambau program meri geran Projek Mit Menua Pesisir (MRP) ngagai sekeda Gerempung Ukai Dikuasa Perintah (NGO) sereta meri angpau enggau barang pemakai ngagai sekeda rayat di Parlimen Betong beserimbai enggau pengerami Mantar Gawai sehari tu tadi.
Bantu nya diberi Gerempung Pemulai Pemanah Ulah Che Zhong Khor, Betong.
Rentap ke mega Kaban Kunsil Nengeri (ADUN) Layar meransang perayat di Betong bela sampal datai nyukung atlit ke bepekit dalam Sukan Malaysia (SUKMA) ke-21 ti diatur bulan Ogos taun tu.
Nangkan ke nya, Kaban Parlimen Betong, Dr Richard Rapu madahka, sida ti nyadi pengari rayat GPS nyambut manah pengawa NGO ke ngemeratka pengelantang rayat sereta gerah jari meri bantu ngagai rayat.
“Taja pan bantu ke diberi nya enda mayuh, tang ulih ngelempungka mimit tating belanja rayat ti begunaka bantu nya.
“Ketebal agi kaban belayan kitai ti deka ngintu Hari Gawai enda lama agi,” ku iya madah.
Entudi ke nya, Sapit Chairman Gerempung Pemulai Pemanah Ulah Che Zhong Khor Tan Tai Tan madahka, gerempung sida suah meri bantu ngagai perayat lokal di Betong tetiap kali bisi pengerami besai disambut.
“Kami sigi chakah meri bantu sekalika pengerami Taun Baru China, Hari Raya Aidilfitri enggau Hari Gawai Dayak,” ku iya.
Bisi 100 iku penerima ngaul pengani rumah panjai di parlimen Betong nerima bantu angpau enggau barang pemakai dalam program nya.
Berebak enggau nya bisi enam NGO nerima geran MRP ari Dato Gerald Rentap Jabu ti nguna agih penyampau RM260,000.
Sama bisi datai ngulu program nya raban Tuai Komuniti enggau Tuai Raban Bansa (KMKK) sereta bala pemesai enggau pegawai perintah di Betong.-TVS
