BANGKOK, 17 Mei: Tuai Pegawai Eksekutif Sarawak Energy Berhad (SEB) Datuk Sharbini Suhaili ngasaika Aum Besai Pendiau Dudi Hari Kuasa Asia 2024 nyadi pantar pemadu manah endur raban sida bekerejasama enggau ejensi antarabansa kelimpah betukar buah penemu pasal ubah kuasa baru.
Iya madah, SEB endang sebuah ejensi ke bejalaika tanggungpengawa dalam nyukung pemansang teknologi gadung.
“Kitai ba Sarawak betuah laban ngembuan pugu ke tegap dalam polisi pemansang kuasa ulih dikemaru.
“Nyadi nya, ngujungka kami terus ngemansangka penau kuasa gadung di nengeri tu,” ku iya madah ngagai TVS pengudah tembu merarau begulai enggau Premier Sarawak Datuk Patinggi Tan Sri Abang Johari Tun Openg ditu, kemari.
Ku terang iya, naka tu SEB udah ngasilka 70 peratus kuasa hidroeletrik sereta deka terus ngasilka mayuh agi kuasa baru dudi hari.
“Dikena nyapai nya, kitai ngembuan juluk nyadi pengerandang kuasa serantau enggau kitai mega deka bekunsi kuasa baru dikemisi kitai enggau menua sepiak ngambika semua ulih ngalih ngagai kuasa gadung di rantau tu,” ku iya.
Ke penerang, SEB udah dikangau nyadi panel Aum Besai Pendiau Dudi Hari Kuasa Asia 2024 ke diatur ba Palan Konvensyen Queen Sirikit Bangkok berengkah 15 nyentuk 17 Mei tu.-TVS
