BANGKOK, 17 Mei 2024: Perintah Sarawak terus bebendar ngelakuka kuasa ulih dikemaru ba rantau tu seraya nempa nengeri tu ba penuduk pemadu luan dalam revolusi kuasa gadung enggau ekonomi hidrogen.
Premier Sarawak, Datuk Patinggi Tan Sri Abang Johari Tun Openg madah, pengawa ngalih ngagai kuasa baru ukai semina meri pemaik ngagai rampa menua tang mega meri empas ke besai ngagai ekonomi enggau komuniti lokal.
“Pengeransing Sarawak ngagai kuasa hidro ulih dikemaru udah numbuhka peluang endur kami ngemansangka kaul enggau menua sepiak dalam Asia Tenggara seraya bekunsi penatai pemisi ulih dikemaru kelimpah ngelengkaska agi ubah kuasa serantau seriris enggau juluk nyadi kuasa besai kuasa ulih dikemaru ba menua serantau,” ku iya.
Abang Johari madah munyi nya maya bejaku ba Aum Besai Pendiau Dudi Hari Kuasa Asia 2024 diatur ba Palan Antarabansa Ratu Sirkit (QSNCC) ditu, pagi tadi.
Ku terang iya, Sarawak mega bebendar dalam mungkal atur inovatif ke ukai semina nyungkak ekonomi nengeri tang mega nyaga rampa menua ungkup rebak dudi.
“Ba pugu iya, hidrogen ukai semina nyadi kereban minyak injin. Tang iya mega peransang ngagai Sarawak ngambi lebih gadung enggau ulih jaga.
“Dalam bejalaika hidrogen Sarawak nuju ngagai tiga batang pekara besai iya nya pasal kerejasama global, dasar efektif enggau inovasi teknologi kemaya hari.
Berebak engga nya, Johari madah penyereta iya dalam Forum Teknologi Hidrogen Eropah Tengah di Poznan Poland tu deka mandangka ngagai ekonomi baru seraya dikena ngenalamka strategi hidrogen enggau pemansut karbon. – TVS
