SARATOK, 16 Mei: Pemar pengidup ditapi siku orang tuai, Renang Saying beumur 57 taun ke diau kediri ba langkau kebun di Meruji Kabo Saratok nerima perati Kaban Kunsil Nengeri (ADUN) Krian Friday Belik.
Ku iya, bantu ke patut ungkup tudah Renang deka diperundingka enggau raban ari Opis Pengintu Pengelantang Raban Bansa (JKM sereta Opis Pelilih Saratok (DO).
“Aku udah ngasuh bala ari Opis Pelilih sama enggau bala ari Palan Servis (ADUN) Saratok datai ngabas lalu meda kediri empu nama utai ke nyadi din.
“Nya alai, nitihka berita orang tuai tu Renang anak Saying ari Meruji Kabo iya tu diau kediri ba langkau kebun ke udah repuk.
“Kami diatu benung berunding enggau JKM sereta Opis Pelilih bekaul enggau atur meri bantu ke patut enda lama agi,” ku iya.
Iya madah munyi nya lebuh ditanya bekaul enggau isu siku orang lunggar umur ari meruji kabo ti dikerembaika ba media rama Facebook apin lama.
Sebedau tu, ba laman Facebook diempu siku peranak Saratok bisi mandangka penusah ditapi siku orang tuai ari Meruji Kabo diau kediri ba langkau kebun ba tanah ke diempu sida ke sama menua.
Berindik ari nya, bala ari Palan Servis ADUN Krian begulai enggau bala ari Opis Pelilih Saratok diuluka SAO Laga Kueh bisi ngatur penemuai ngabas Renang seraya ngulihka penerang ari iya empu.
Nitihka rikod, tudah Renang tu siku ari penerima bantu ninting bulan sepenyampau RM250 ari JKM kenyau ari taun 2011.-TVS
