Miri, 13 Mei: Pengawa nguburka tudah niang Datuk Mutang Tagal bejalai enggau lanchar ba Fairy Park Miri Memorial ditu ngalihari tu tadi.
Pengawa beradat mai sentubung Yang Di-Pertua Diwan Negara nya datai urung pukul 2.15 lemai, disan lapan iku kaban Polis Diraja Malaysia (PDRM).
Pengawa nguburka niang digulu urung 1,000 iku nyengkaum sida sebilik, bala bakih, kaban belayan sereta mensia mayuh.
Bini niang, Datin Ho May Leng enggau ketiga-tiga anak iya iya nya Rining, Saran enggau Bian sama bisi datai.
Pengawa meri basa kepenudi dipunka raban PDRM lalu ditangkan sida sebilik ngeletak bungai ba atas sentubung sebedau sentubung iya ditanam pukul 2.56 lemai.
Sebedau dianjung ke pendam, niang dulu disembiangka ba Gerija SIB Canada Hill.
Mutang, 70, midang pukul 11.46 pagi ba Institut Jantung Negara (IJN) ketegal penanggul tungkul ati, kena Hari Lima tu tadi.
Tudah niang dibai ke Miri ngena bilun Soldadu Langit Diraja Malaysia (TUDM) Charlie 130 Hercules pengudah tembu pengawa meri basa ba di Kuala Lumpur.
Niang Mutang bansa Lun Bawang ke mega Dayak keterubah dipadu mangku pengawa nyadi Yang Di-Pertua Diwan Negara.
Niang mega kala gawa nyadi Kaban Parlimen Bukit Mas enggau Presiden Kaunsil Dagang enggau Industri Orang Ulu (OUCCI).-TVS
