BINTULU, 12 Mei: Indai endang nyadi tulang belakang dalam sesebengkah ruang bilik.
Pia ku Kaban Kunsil Nengeri (ADUN) Tanjong Batu, Johnny Pang Leong Ming ti ngasaika pengasih siku orang ke begelar indai enda alah kira.
Nyerumba Hari Indai taun tu, Palan Servis Tanjong Batu sehari tu tadi bisi nyadung 200 iti pating bungai kelai terima kasih ngagai raban indai ke udah mayuh bejasa.
Chairman Parti Sa’ati Rayat Sarawak (SUPP) Pampang Bintulu nya madah, rambai jaku ‘Terima Kasih Indai’ ungkup Hari Indai Renggat Nasional 2024 endang nemban dikena ngelai tanda basa ngagai indai ke udah bejasa ngagai sesebengkah ruang bilik.
Johnny Pang madah munyi nya maya dirandau media pengudah tembu Pengawa Nyadung Bungai Ngagai Bala Indai Enggau Orang Indu ba Medan Jaya, ditu pagi tadi.
Nangkan ke nya, ku Johnny lebuh kitai ngenang baru, indai mih orang ke seruran begulai enggau anak sereta nulung anak ari belakang, enda ngira baka ni utai diasaika bala anak, indai mih seruran nyadi pengering.
“Aku ngarapka semua kitai anang enda ingat, seagi indai kitai agi idup, kita mesti bebasaka indai laban iya udah mayuh bejasa ngagai bala anak.
“Aku deka meri Selamat Hari Indai ngaga semua bala indai,” ku iya.-TVS
