MIRI, 12 Mei: Apai niang Yang Dipertua Diwan Negara, Datuk Mutang Tagal nerima enggau ati tebuka pemidang anak lelaki kedua iya nya.
Tagal Paran, ke beumur 91 taun, dipeda diau jenuh enggau nerima pemidang niang ke chukup ngenyit nya.
“Taja kami sinu, tang tu mega peneka Tuhan.
“Lebuh Tuhan ngangau kitai, kitai enda ulih ngaga nama-nama, “ ku iya enggau ati setuju.
Tagal mega kala lenyau anak tuai, iya nya Judson Sakai Tagal ke bebadi nyawa ba penusah helikopter terempas di Bario taun 2004.
“Aku bisi tujuh iku anak lalu diatu, kededua anak lelaki aku udah dikangau Tuhan,” ku iya.
Taja pia, iya chukup temegah laban kededua anak lelaki iya nya kala gawa dalam perintah enggau bejasa ngagai menua.
Niang Datuk Mutang dikuburka ba Pendam Fairy Park di Lambir. -TVS
