SARATOK, 12 Mei: Penatai Hari Indai ke diintu kena 12 Mei taun tu nyadi peluang dikena mensia mayuh ngingatka jasa indai diri empu ke udah bekenanas nupi ari mit nyentuk ke besai.
Nya alai, beserimbai enggau Hari Indai mega, pengari TVS Saratok bisi ngerandau sekeda raban indai seraya mendingka Pesan Hari Indai ari bala sida ba Palan Bazar Gawai Dayak SDNU Saratok 2024, kemari.
Connie Enchana, 56 taun ari Rumah Panjai Engkudu Baruh ditu madahka orang ke begelar indai patut ngembuan semangat ke kering dalam napi bemacham pemar dikena negika sebuah ruang bilik ke likun sereta lantang.
“Pesan aku ngagai kitai ke semua indai tu ngarapka kitai ulih ngeringka semengat diri lalu ulih ngintu ruang bilik diri empu baka ke ngelama tu.
“Keringka semengat kitai ke nyadi indai tu ngintu ruang bilik kitai awak ke kitai terus mujur,” ku iya.
Udah nya, Angela Apong, 36 taun madah, kaul ke manah antara melaki bini nyadi kunchi sukung nyadi siku indai ke mujur.
“Kitai ke bisi ruang bilik tu baka reti laki tauka apai patut sama betulung betulak ansur, meretika pengawa pangan diri begiga jereki.
“Pesan ari aku nyerumba Hari Indai tu iya nya besampika semua indai mudah bulih jereki, seruran gerai dalam ngintu ruang bilik,” ku iya.
Nangkan ke nya, Grace Simuh Newland asal ari Kuching enggau bakih iya Petra Bell Henderson ari Jerman ke seninjik nemuai ke Saratok madah, ungkup sebuah ruang bilik ke lantang orang ke begelar indai mih nyadi chura semua iya lalu jasa sida patut dibasa.
“Enti indai kitai udah tuai, kitai patut nyaga sida enggau manah.
“Baka aku empu, taja indai aku udah nadai taun nyin kemari. Aku ngasai diri chukup betuah laban ulih nyaga indai, aku mulaika diri gawa ari Kuala Lumpur lalu nyaga iya ba rumah panjai nyentuk ke seput iya padam.
“Nyadi…Selamat Hari Indai nuju semua bala indai di serata dunya,” ku iya.-TVS
