KUCHING, 11 Mei: Tuai Pampang Parti Pesaka Bumiputera Bersatu (PBB) Krian Bell Bernard Aggan madah diri nadai mantaika isu ti ‘angat’ ba sitak Kunsil Nengeri (DUN) Krian baka ke diripot sebedau tu.
Ku iya, isu nya tebantai nyangka penerang ke dipansutka iya maya bejaku ba sebengkah Pengerami Makai Lemai PBB Pampang Krian sebedau tu enda nyentuk tauka disalah peragam.
“Nyangka jaku disebut aku enda berapa nyentuk, nama utai ke disebut aku kebendar aku ngarapka maya timpuh iya (Friday Belik) nyadi pengari rayat aku ngarapka semua pemansang ulih diasaika semua.
“Iya endang siku orang (tuai) ke bebendar gawa dalam ngulihka belanja enggau ungkup semua rumah panjai di Krian.
“Urung 200 lebih ulih meda kediri pemansang ke dibai iya lalu kitai ngarap maya PRN ila GPS ulih ngetanka baru penuduk Krian tu, nya mih reti utai deka dipadah aku kebendar iya,”ku iya.
Bell madah munyi nya maya dirandau media ba Kompleks Kunsil Nengeri (DUN) ditu, kemari.
Sebedau tu, Bell diripotka maya bejaku ba sebengkah Pengerami Makai Lemai PBB Pampang Krian bisi minta agih belanja ke lebih adil ungkup sitak DUN Krian.
Taja pia penerang nya nerima bemacham timbal ari sekeda raban lebih agi sida di Krian.-TVS
