SRI AMAN, 11 Mei: Urung 474 iku nembiak nyengkaum pengajar enggau staf pemantu Sekula Primari (SK) St Luke Sri Aman ngulu program Licha Pengelikun Maya Angus enggau Simulasi Ngerara Api diatur ba sekula nya, kemari.
Tuai Balai Bomba enggau Penyah Penusah Sri Aman Andrew Vengitasamy madah, program licha nya diatur dikena narak penemu tumu pasal chara ngerara api.
“Raban Bomba Sri Aman betuaika Pegawai Bomba Kanan II Noor Faqriakmal begulai enggau tujuh iku agi staf ke bukai ngemujurka program nya.
“Sida ke ngulu program tu nyengkaum bala pengajar iya nya 34 iku, staf pemantu tujuh iku enggau bala nembiak sekula bisi 433 iku,” ku iya.
Iya madah munyi nya maya dirandau pengari TVS, kemari.
Ku iya, program baka nya nya chukup beguna ngamnbika bala nembiak enggau pengajar ulih nemu pekara ke patut digaga nyema bisi nyadi penusah ke enda disadang.
Sama bisi diatur nyerumba program nya baka Licha Pengelikun Angus, Stop Drooll and Roll, Licha enggau Demontrasyen Ngerara Api (I-SURI) enggau Licha seret Demontrasyen Nguna Kereban Pengerara Api.
Program nya diatur pengelama urung tiga jam bepalan ba Diwan Datuk Bolly Lapuk enggau ba laman entepan kerita Gerija Saint Luke Sri Aman.-TVS
