KUCHING, 10 Mei: Sitak Kunsil Nengeri (DUN) Krian diatu diperati ba menasan ke nemban dikena neruska pemansang.
Sekretari Politik ngagai Premier Sarawak Bell Bernard Aggan madah, tu diumba enggau pengawa nyiri Senator Pele Peter Tinggom nyadi Kaban Diwan Negara ngujungka iya ulih mantu nyadi penyambung senentang isu ari Krian ngagai Perintah Besai.
“Nyadi nengah pemisi YB Senator enggau aku nyadi Sekretari Politik Premier deka mantu ADUN Krian Friday Belik enggau YB Senator Pele Peter Tinggom terus ngemansangka DUN Krian.
“Nyadi nya siti pemansang politik di Krian laban kitai ngembuan pengari rayat ke ulih ngenataika peminta rayat Saratok ba renggat Perintah Besai,” ku iya.
Iya ke mega Tuai Pampang Parti Pesaka Bumiputera Bersatu (PBB) Krian madah munyi nya pengudah mendingka Aum Kunsil Nengeri Sarawak ditu, pagi tadi.
Ku iya laban ke nyadi Sekretari Politik ngagai Premier Sarawak iya deka terus bekerejasama enggau pengari rayat sereta senator ngatur pemansang.
Iya madah, kerejasama nya chukup beguna dikena ngerampas baru sitak Saratok ari penyakal ungkup pengawa bepilih besai (PRU) udah tu ila. -TVS
