KUCHING, 10 Mei: Perintah Sarawak ngemendarka senapang patah diariska ari apai indai ngagai anak lelaki tauka indu aja.
Taja pia, ku Sapit Menteri ba Opis Premier Sarawak (Undang-Undang enggau Adat Bumiputera) Datuk Jefferson Jamit Unyat madahka, pengempu senapang patah mesti direjister baru lalu peminta mesti bulih pemendar ari sukut pengelikun enggau pengerai.
“Seriran enggau guna sereta budaya lokal, polisi ke baru Perintah Sarawak udah ngemendarka senapang patah diariska enggau penetap pengempu mesti ngerejister baru lalu peminta mesti bulih pemendar pengelikun enggau pengerai,” ku iya.
Iya madah munyi nya maya nyaut tanya (ADUN GPS-Baleh), Nicholas Kudi Jantai ba Aum Kunsil Nengeri Sarawak ditu pagi tadi.
Iya mega madah statistik penyampau pengempu senapang patah ba selampur sarawak enggau mega ba bagi menua kapit.
“Statistik pengempu senapang patah ba selampur menua Sarawak iya nya 45,568 lalu statistik pengempu senapang patah di bagi menua Kapit aja iya nya 5,646,” ku iya. -TVS
