KUCHING, 9 Mei: Bisi 11 lebak sungai diperati bisi penau dikemansang nyadi puncha kuasa ai anyut udah dikelala di Kapit enggau kandang menua adap ke utara Sarawak.
Sapit Menteri Utiliti enggau Telekomunikasyen, Datuk Dr Abdul Rahman Junaidi madah, diatu pansik benung dipejalaika perintah Sarawak begulai enggau Sarawak Energy Berhad (SEB).
“Sebelas lebak sungai ke bepenau dikemansang gaga tekat ai anyut tauka jaku baru iya, puncha kuasa ai anyut iya nya di Sungai Tutoh, Sungai Baram, Sungai Tinjar di Miri, Sungai Gaat, Sungai Belaga, Sungai Danum, Sungai Balui enggau Sungai Katibas di Kapit, Sungai Trusan, Sungai Lawas, Sungai Tursan di Lawas, enggau Sungai Limbang,” ku iya.
Iya mansutka jaku nya lebuh nyaut tanya Kaban Kunsil Nengeri (ADUN) Tanjong Datu, Azizul Annuar Adenan pasal penyampau peminta projek telat ai anyut diterima Opis Menteri enggau Telekomunikasyen Sarawak naka tu maya Aum DUN Sarawak, pagi tadi.
Dikena mungkal iya ku Abdul Rahman, Sungai Gaat Kapit udah dipilih nyadi projek pemungkal endur mansik pemeruan bejakaika puncha kuasa nya.
Taja pia ku iya projek nya semina ulih dipejalaika enti sema disetuju peranak ke ngempu menua.
Opis menteri nya mega ku iya udah nerima sekeda perambu ari pengari rayat ngambi bejalaika projek nya ba menua diri.
Peminta ulih dikenataika nengah chara betulis nuju Opis Menteri Utiliti enggau Telekomunikasyen ngambika diperunding.-TVS
