SPAOH, 4 Mei: Rayat pupu bansa di Sarawak lebih agi di Debak dilalau terus beserakup bepelasarka semangat segulai sejalai dikena napi pemar dudi hari.
Kaban Parlimen Betong Betong Dr Richard Rapu madah, semangat nya patut ditan baka ke udah dipandang sebedau tu ke pemaik semua.
“Kitai nemu endang mayuh agi pemar udah nganti ba mua.
“Nyadi nya kebuah nengah penyerakup ke tegap antara semua kitai nya deka nyadi pekara ke pemadu beguna dikena kitai negapka semangat segulai sejalai ke endang udah lama dipandang di Debak enggau di Betong ditu,” ku iya.
Iya madah munyi nya maya bejaku ba Pengerami Ramah Tamah Aidilfitri enggau Mantar Gawai Dayak 2024 di Dewan Millenea Debak, malam tadi.
Berebak enggau nya ku iya, bala Tuai Rumah enggau Tuai Raban Bansa (KMKK) endang komiti ke chukup beguna dikena nentuka semua langgur pengawa ke ke udah ditusun ba menua diri ulih dikemujur.
Ba pengerami nya Dr Richard bisi nyuaka geran ngagai 14 pengari Komiti Pemansang enggau Pengelikun Genturung Pendiau (JKKK) ba sitak DUN Saribas sepenyampau RM58, 000.-TVS
