LIMBANG, 4 Mei: Statistik Indu Opis Polis Pelilih (IPD) Limbang mandangka penyampau kes jenayah komersial ungkup timpuh Januari nyentuk April taun tu bisi nurun 13 kes dibanding timpuh ke sebaka taun nyin kemari ke ngerikod 26 kes.
Tuai Polis Pelilih Limbang Superintenden Parum Niot madah, 13 kes jenayah komersial diripotka taun tu ngaul 12 kes tipu enggau siti kes bukai ngerikodka pengerugi manggai RM160,650.
Nangkan ke nya, ku iya 26 kes ti diripotka taun nyin kemari ngaul 17 kes tipu, empat kes jenayah siber enggau lima agi ngaul kes bukai ke ngerikod penyampau pengerugi manggai RM238,991.
“Ungkup pelilih Limbang enggau Lawas nitihka pansik Januari nyentuk April 2024 jenayah komersial kitai ngambika mensia mayuh nemu asil ripot pansik ke dipejalai mandangka bisi nurun 13 kes.
“Ke penerang ba taun 2023, bisi 26 kes lalu nurun 17 (kes), nyadi (taun tu) bisi 13.
“Tu asil ari operasyen ke dipejalaika kitai, bekau ari pengawa dipejalaika nengah kimpin di pelilih Limbang enggau Lawas,” ku iya.
Iya madah munyi nya maya dirandau ba Pengerami Seloka Aidilfitri enggau Sejambak Kasih IPD Limbang, ditu kemari.
Ku tandu Parum, antara kimpin ke udah dipejalaika nyengkaum Program Meet and Great, nagang jenayah besai ke ngaul pegawai kanan nyaup datai ngerap enggau Amanita diperati mandangka empas positif.
Ba program tu ku iya polis ulih betemu enggau mensia mayuh seraya meri penyedar ngambika enda mudah teparuk enggau jenayah siber.
Ku iya mensia mayuh mega dilalau ngambi terus madah ngagai raban polis sebedau ngaga sebarang pemutus enti bisi nerima kangau ari orang ke nyelai.
Iya mega nyemetak madah raban polis Limbang deka terus bebendar mutarka sebarang jenayah nengah pengawa besaup enggau pegawai sereta kaban polis ngambika menua Limbang terus likun.-TVS
