KUCHING, 3 April: Kompleks Unit Pekara Pengarap Bukai (UNIFOR) deka berengkah dibuka ba taun baru pengudah Permit Diau (OP) ungkup kompleks nya dikeluarka ba minggu keterubah bulan September tu ila.
Sapit Premier Sarawak, Datuk Amar Douglas Uggah Embas ke mega menteri ti megai tanggungpengawa ungkup UNIFOR madahka pengawa ngemanah deka dipejalaika dulu sebedau proses pindah masuk ngagai kompleks nya dipejalaika.
“Nyadi, kitai nadai nyadang barang sapa deka pindah kitu ba minggu keterubah bulan September tu.
“UNIFOR deka berengkah bejalaika pengawa ngemanah ba bulan September enggau engka deka pindah ba taun baru,” ku iya.
Iya madah munyi nya rambau aum media pengudah licha pasal status pemansang projek, ditangkan ke enggau Pengawa Ngabas Taba Projek bepalan ba Jalai Ong Tiang Swee, kemari.
Sama bisi nyempulang pejalai Uggah, iya nya Sapit Premier Sarawak Dato Sri Dr Sim Kui Hian ke mega Kaban Kaunsil Amanah Pengelantang UNIFOR enggau Sapit Menteri Pengerai Mensia Mayuh, Pengawa Berumah Enggau Perintah Lokal, Datuk Dr Penguang Manggil.
Taja pan napi pengelaun mimit, uggah ke mega Menteri Pemansang Infrastruktur Enggau Palan Penyangkai Kapal (MIPD) berasai lantang ati meda pengerembai pengawa ngaga kompleks nya nyentuk ke sehari tu sereta andal raban kunteriktor ulih nembuka projek besai ungkup Gabungan Parti Sarawak (GPS) nitihka haribulan ke udah ditetapka.
Lebuh ngelansa pasal pengawa ngaga kompleks nya ti dijangka deka napi penanggul jalai alun sekut pengudah projek nya tembu ila, Uggah madahka pansik pasal jalai alun deka dipejalaika dikena nentuka kompleks nya mudah diakses.
“Enggau penembu begunan tu ila, kitai mega ngembuan begunan Diwan Dagang enggau Industri Dayak (DCCI), beguna baru Yayasan Budaya Dayak (DCF), Gerempung Nasional Dayak Bidayuh (DBNA) sereta bisi mega pemansang ba sepiak jalai nya,”ku iya.
“Reti nya kandang endur tu deka napi penanggul penyekut jalai alun.
“Endang dikemeratka dikena kitai nentuka kandang endur tu ulih diakses laban kitai ngembuan sekeda lot kedai ungkup pengawa dagang,”ku iya.
Ungkup rikod, kompleks UNIFOR enggau penyampau ungkus kunterik projek manggai RM63.6 juta nya berengkah digaga kenyau ari bulan Julai 2022, nyengkaum begunan peninggi 10 ringkat enggau diwan aum ba taba pemesai tiga ikar.-TVS
