KUCHING, 2 Mei: Achara terejun platform 10m deka dipekitka baru dalam Lumba Malaysia (SUKMA) 2024, lalu achara futsal indu mengkang ditingkilka ari pekit nya.
Ngenuku ke pekara nya, Menteri Nembiak, Lumba Enggau Main Sereta Pemansang Orang Dagang Sarawak Dato Sri Abdul Karim Rahman Hamzah madahka pemutus nya digaga asil ari aum komiti tinggi SUKMA enggau Menteri Nembiak, Lumba enggau Main, Hannah Yeoh sereta kontinjen nengeri ke bekaul.
“Keterubah, enam achara ditingkilka tang pengudah baum, sekeda nengeri udah setuju deka nganjung atlit.
“Semina bisi dua enggau siti ari nya nyengkaum futsal indu.
“Naka diatu bisi lima nengeri, empat nengeri ti nyanggup deka nambah dikena nyadika penyampau nya lima tang kitai mesti nyapai enam, lalu futsal indu deka ditingkilka, siti agi iya nya… keingatka aku baru dikena ngulihka penerang ari Ejensi Lumba Sarawak (SSC),”ku iya.
Iya bejaku munyi nya pengudah Aum Media Keterubah Malin Temuai Asean ba Begunan Baitulmakmur 2, sehari tu tadi.
Berebak enggau nya, Karim madah diri endang lantang ati achara terejun 10 meter indu (udah dipasukka baru).
“Mayuh lumba tu entara ti nadai nyapai tikas minimum, nyadi aku pengujung iya asa ati nama kebuah nengeri nadai mantu.
“Nyadi, achara 10 meter terejen indu dipekitka baru.
“Kelimpah ari nya, Poomsae Taekwando. Ke bukai iya nya mega achara terejun, achara terejun berirama.
“Keempat iya nya, aku enda ingat tang pemadu kurang bisi sekeda pengerembai,” ku terang iya.
Nerang pasal pemansang pejalai pengawa ngangkatmanah fasiliti lumba, iya madahka pengawa ngangkatmanah nya agi dipejalaika, lalu ditaga tembu penuh bulan June.
Kelimpah ari nya, tandu Karim, Sarawak deka nguna pengelebih nyadi tuai rumah ngambika ulih nyadi champion ba SUKMA serak tu.
“Kepenudi kitai nyadi champion iya nya 30 taun ke udah (taun 1994).
“Udah nya kitai ba penuduk kedua, ketiga enggau keempat. Kitai nyapai taga bulih penuduk atas tang kitai seruran nyadi lima ti pemadu manah.
“Tang kitai enda kala nyadi champion pengudah 30 taun. Aku madahka ngagai tim taun tu kitai mesti nyadi champion laban Sarawak ti ngatur SUKMA serak tu,” ku iya.
Bisi lima palan lumba besai endur ngengkah raban atlit ari 15 kontinjen bepekit iya nya ba Universiti Malaysia Sarawak (Unimas) Kota Samarahan, Kolej Laila Taib ba Sibu, Universiti Teknologi Mara (UiTM) Kampus Mukah, Universiti Putra Malaysia (UPM) Kampus Bintulu sereta Institut Pengelandik Nembiak Menua (IKBN) Miri.-TVS
