KUCHING, 28 April: Kelab enggau gerempung ukai dikuasa perintah (NGO) di Sarawak ti deka ngatur program seni enggau main asal baka woksyop ngajat, main muzik, ngaga krafjari enggau kus nyumai tradisional diperansang minta turu khas ti disediaka perintah nengeri nengah Opis Menteri Dagang Temuai, Industri Kreatif enggau Seni Persembahan (MTCP).
Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madahka, opis menteri iya bisi agih khas sepenyampau RM10 juta ti ulih diguna dikena ngatur aktiviti bekaul seni enggau main asal.
Iya nerang, penyampau turu ti diberi bepanggai pemesai skala program ke deka diatur.
Berindik ari nya , iya semampai deka nyukung pengawa baka nya lebih agi ngangkatka pengelandik nembiak rebak baru dalam pengawa belajarka sentang pesaka asal, seni enggau budaya bansa di Sarawak.
“Nyadi nama patut digaga enti kita deka ngatur kelas bengkel ngajat ulih minta ngagai opis menteri kami dibaruh pegai aku Industri Kreatif.
“Ninting taun kami bisi urung RM10 juta dikena nyukung industri kreatif tu.
“Bisi sekeda kategori ulih minta baka ngatur bengkel ngajat, bengkel krafjari tauka bengkel nyumai pemakai asal ambika chunto dibuka ngagai rebak baru,” ku iya.
Iya mansutka jaku nya rambau Pengerami Malam Gerempung Ngajat Asal Iban (NGASI) 2024 ba Palan Konvensyen Penview (PCC) Demak ditu, malam tadi.
Iya nambah, perintah Sarawak meri mayuh macham pelantar sereta turu ungkup guna pengemeran seni ngatur mayuh bengkah aktiviti seni enggau budaya.
Berindik ari nya, iya ngansak sesiku orang ti bisi bakat datai ke mua mantaika budaya ke bisi di Sarawak.
Ba pengerami nya, iya bisi meri bantu turu sepenyampau RM20,000 ngagai NGASI nyadika agih tambah dikena ngatur aktiviti ke udah dilanggur gerempung nya.-TVS
