SPAOH, 28 April: Sebuah diwan futsal baru beungkus RM3 juta deka digaga ba Pasar Mit Spaoh.
Kaban Kunsil Nengeri (ADUN) Bukit Saban Datuk Amar Douglas Uggah Embas madah, tuju diwan baru nya digaga ungkup pengelantang komuniti lokal ke diau mendam ba pelilih nya.
”Sehari tu enti kitai meda diwan tu enda chukup besai alai ngatur program.
“Nya alai, aku enggau sekeda pemesai lokal udah berunding deka ngaga sebuah diwan futsal ke lebih besai.
“Aku udah madah perambu ngagai sida ngaga diwan ke ulih muat 200 iti mija lebih besai ari diwan tu.
“Nya kebuah kami deka nentuka projek tu ulih dipejalaika,” ku iya maya bejaku ba Program Ramah Tamah Aidilfitri Kampung Spaoh ditu, kemari.
Uggah mega nerangka, projek ngaga diwan baru nya deka dipejalaika ba baruh Ejensi Pemansang Bagi Menua Betong (BDDA) nengah ungkus manggai RM3 juta.
Program sehari nya diatur bisi digulu urung 500 iku temuai.
Sama bisi datai bini ADUN Bukit Saban Datin Amar Doreen Mayang, Kaban Parlimen Betong Dr Richard Rapu sereta ke bukai.-TVS
