SARATOK, 26 April: Tetiap iku Tuai Raban Bansa (KK) mesti pintar dalam ngesan tangkup pengawa lebuh bejalaika pengawa ke udah diberi ngagai sida.
Kaban Kunsil Nengeri (ADUN) Krian, Friday Belik madahka, tuai raban bansa mega patut nyadi penyukung sereta pengembing lalu enggau naka ulih beratika tetiap penanggul ditapi pengani ke dijaga sida.
”Kitai nyadika tuai mesti ulih meri peransang ngagai orang ke dipegai kitai.
“Peransang orang sama-sama gawa enggau kitai enti orang nya dipeda tua bisi pengelemi anang nekan terus beri iya peransang awak ke sama-sama ulih angkat.
“Nya tanggungjawab nyadi tuai anang meda orang lemi lalu diindik (dikemaruh), dianu, enda peduli nyadi nya salah.
“Kebendar orang ke meda kitai tuai, sempama baka lampu meri penampak ngagai orang bukai tauka kumbai inspirasi (peransang),” ku iya.
Iya bejaku munyi nya rambau Pengerami Nutup Seminar Tuai Raban Bansa (KK) enggau Sekretari JKKK Rumah Panjai ti diatur Komiti Kuasa Pemansang enggau Pengelantang Tuai Raban Bansa Sitak Krian Tengah ba Diwan Opis Pelilih Saratok, Hari Empat tu tadi.
Tandu iya, Tuai Raban Bansa mega mesti bejalaika tangkup pengawa sida nitihka garis lalau ti udah ditetapka.
Bisi 76 iku Tuai Raban Bansa enggau Sekretari JKKK ari 38 rumah panjai ti udah datai ngulu program ti keterubah iya diatur ba pelilih Saratok .
Sama bisi datai Sekretari Politik Premier Sarawak, Bell Bernard Aggan enggau Pegawai Pelilih Saratok, Mohamad Dino Amid.-TVS
