KUCHING, 26 April: Statistik kes churi kabel ba suku keterubah taun 2024 enti dibanding enggau taun 2023 ngayanka trend kes ti majak nambah iya nya penyampau 67 peratus.
Menteri Utiliti enggau Telekomunikasyen Sarawak Dato Sri Julaihi Narawi madahka bagi timpuh bulan Januari nyentuk bulan March tu tadi, bisi 45 kes enchuri kabel diripotka enti dibanding semina 27 kes ba timpuh ke sama taun nyin kemari.
“Kes churi kabel enti ba bulan Januari nyentuk bulan March 2024, 45 kes diripotka enti dibanding enggau ba bulan Januari nyentuk March 2023 iya nya 27 kes bisi nambah iya nya 67 peratus.
“Ba suku keterubah taun nyin kemari, 2023, Januari nyentuk Mac 27, suku keterubah taun tu Januari nyentuk bulan Mac bisi 45, nyadi bisi nambah 18 kes tauka 67 peratus, lalu reti iya tu entara aset ti ditagit,” ku iya.
Iya bejaku munyi nya rambau aum media ba Begunan Kaunsil Pemansang enggau Nyaga Tanah (LCDA) ditu, kemari.
Ngelansa pekara bukai, Julaihi madah Projek Numbuhka Makmal Pansik Agro Sarawak ti sepenyampau RM35 juta deka berengkah dipejalaika taun tu.
Ku iya, Penumbuh Makmal Pansik Agro ba Sebuyau nya deka mekuhka ngagai pengawa nanam baru kelapa ba pelilih nya.
“Enti nadai penanggul, taun tu projek nya deka berengkah dipejalaika enggau kami udah bisi pelin ti komprehensif ti deka dipejalaika nengah makmal pansik enggau kerejasama raban UNIMAS,”ku iya.
Tandu iya, pengawa betemu nya, dikena ngangau Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Wan Tuanku Jaafar enggau bini iya, Toh Puan Fauziah Mohd Sanusi nyadi temuai ti dipebasa ba Pengerami Gempuru Aidilfitri Pelilih Sebuyau 2024.
“Penemuai basa aku enggau raban aku sechara rasmi deka ngangau Tuai Pemegai Menua (TYT) Tun Pehin Sri Datuk Sri Wan Junaidi ke Pengerami Ramah Tamah ba Sebuyau kena 27 April, Hari Enam tu.
Nya tuju besai penemuai basa tu,” ku iya.-TVS
