KUALA LUMPUR, 26 April: Program Betukar Nembiak Yayasan Sarawak nyadi siti program dikena negapka agenda intergasi nasional entara Semenanjung Malaysia enggau Sarawak nengah pelajar ngaul sponser enggau nganjung nembiak ke nyulut ngagai Pom 1 nyentuk Pom 4 ba sekula bemalam penuh ke udah dipilih.
Sapit Menteri Besai Datuk Seri Fadillah Yusof madahka, Program Betukar Nembiak tu nyadi siti inisiatif ke manah enggau patut terus dipejalaika dikena ngerapitka kaul entara menua Semenanjung, Sarawak enggau Sabah.
“Tu siti program ke manah ti disukung mega PETRONAS.
“Kelimpah ari integrasi nasional iya nya dikena ngerapitka kaul entara tiga wilayah tu, iya nya dapat nentuka raban nembiak kitai meretika budaya perayat Malaysia ke bebida penatai.
“Enda ngira sekalika Melayu, ukai Melayu enggau ke bukai lalu pemereti tu beguna bendar dikena kitai numbuhka gaya penyerakup ke tegap ngaul rayat enggau komuniti kitai tebal agi raban nembiak.
“Tu siti pugu pengering menua kitai. Enti menua kitai beserakup, ke bukai ulih mekuhka ari sukut ekonomi, sosial enggau kepenudi ungkup pengelantang enggau pengelikun menua kitai,”ku iya.
Iya bejaku munyi nya rambau pengerami Serumpu Aidilfitri Yayasan Sarawak ditu, kemari.
Ba baruh program nya, Yayasan Sarawak melanja anak sarawak ungkup nampung Sekula Sekondari di sekula bemalam penuh di Semenanjung Malaysia.
Yayasan Sarawak mega melanja nembiak Semenanjung enggau Sabah ungkup belajar sekula bemalam penuh di Sarawak.
Sebedau tu, Yayasan Sarawak udah nganjung raban keterubah dalam Program Betukar Nembiak ba taun 1972.-TVS
