SARATOK, 26 April: Juluk deka meda penatai 200 iku penyereta masuk Pekit Krian MTC Eco Jamboree 2024 dikeandal ulih tejapai.
Kaban Kunsil Nengeri (ADUN) Krian Friday Belik madah pengandal nya bepelasarka timbal positif diterima iya nya naka tu bisi 111 iku penyereta udah ngenuku diri masuk pekit nya.
“Bepelasarka rikod naka tu penyampau sida ke udah ngerejister diri masuk Pekit Krian MTC Eco Jamboree 2024 iya nya udah manggai 111 iku.
“Kitai (Pengatur) agi bisi timpuh dua bulan agi sebedau pengawa rejister ditutup.
“Dipelaba lebih mayuh orang deka masuk pekit tu laban saran kitai iya nya deka meda antara 150 ngagai 200 iku penyereta,” ku iya.
Friday mansutka penerang nya ngagai pengari TVS beserimbai enggau Aum Komiti Besai Pengatur Krian Fest Nature Challenge (KFNC) 2024 ke diatur empai lama.
Ku iya, barang sapa ke rinduka pengawa lumba ekstrem anang enda nguji masuk pekit laban penyampau semua perais ke disedia chukup manah iya nya manggai RM19, 430.
Haribulan kepenudi ungkup pengawa rejister iya nya kena 20 June 2024.
Penerang silik pasal pekit ulih betelefon terus nuju Ihsan ba lumur 013-5612983 tauka Zul (016-8001690).-TVS
