SPAOH, 25 April: Tuai Pemegai Menua (TYT) Nengeri Sarawak Tun Pehin Sri Dr Wan Junaidi enggau bini iya deka nyadi temuai dipebasa ba Pengerami Makai Lemai Gawai Dayak Renggat Nasional di Kuching kena 22 June ti deka datai.
Sapit Premier Sarawak, Datuk Amar Douglas Uggah Embas madah, pemesai bukai ke bela disadang ngulu pengerami tu ila iya nya Menteri Besai Malaysia Datuk Seri Anwar Ibrahim enggau Premier Sarawak Datuk Patinggi Tan Sri Abang Johari Tun Openg.
“Hari Gawai renggat nasional ke mega deka nyadi pengerami ti diintu ba renggat nengeri diatur komuniti Bidayuh betuaika Dato Sri Roland Sagah Wee Inn.
“Semua atur penyikap ungkup pengerami makai lemai kena 22 June tu ila benung dipejalaika, lalu (program) Niti Daun deka diatur kena 15 June.
“Nyadi, aku ngarap pengerami ti diintu serak tu deka mujur nyengkaum program bukai ti diatur ba Kuching,”ku iya.
Iya bejaku munyi nya ngagai pemberita pengudah Pengawa Nyuaka Chek Projek Mit Menua Pesisir (MRP) bagi DUN Bukit Saban ditu, kemari.
Sama bisi ngulu pengawa nya Kaban Parlimen Betong, Dr Richard Rapu, Sekretari ngagai Premier Sarawak, Roselind Mapong Sabai, Pegawai Pelilih Betong Alfred Geling Ason enggau tuai ejensi ke bukai.-TVS
