SARATOK, 25 April: Kaban Kunsil Nengeri (ADUN) Krian, Friday Belik naka tu madah diri berasai tepantup ati enggau tikas pemansang semua Projek Transformasyen Menua Pesisir (RTP) ba sitak DUN Krian.
Berebak enggau nya, iya ngarapka ejensi pengatur ke bekaul deka chakah agi bejalaika pengawa dikena nentuka tetiap projek ke dilanggur tembu nitihka timpuh ke ditaga.
“Pukul rata, aku tepantup ati laban aku ulih meda pemujur projek tu deka meri pengelantang ngagai peranak ba rumah panjai ari segi penembu projek ari segi guna projek baka jalai, parit ngaga tangkir perabung.
“Arapka mayuh projek ulih belabuh lalu tembu nitihka timpuh udah ditetapka udah tu ila,” ku iya.
Friday madah munyi nya pengudah ngabas Rumah Panjai Mut Jilap di Babang laban deka matau Projek Sistem Parit ke udah tembu ba rumah panjai nya, Hari Dua tu tadi.
Projek Sistem Parit sepanjai 150 meter ti beungkus penyampau RM250, 000 nya dipejalaika ba baruh Projek Transformasyen Menua Pesisir (RTP) DUN Krian taun 2023.
Ba taun 2022 suba, 70 peratus projek RTP ba DUN Krian udah mujur ditembuka nyentuk ke diatu, lalu ungkup projek ke diberi ba taun 2023, udah berengkah dipejalaika dalam mayuh renggat.-TVS
