SEBAUH, 22 April: Kampung Labang, ditu udah napi ubah ari sebuah pasar mit nyadi genturung pendiau ti mansang seraya langgur nuju nyadi sebuah pelilih mit.
Kaban Kunsil Nengeri (ADUN) Kemena, Dato Sri Dr Stephen Rundi Utom pemansang ba genturung nya enda ulih dikemujur nyema nadai tangkup pengawa tuai ba renggat baruh ti regas sereta ngembuan integriti ke tinggi.
”Kitai meda kediri baka ni Labang tu ulih mansang jampat agi dibanding enggau pasar mit ke bukai.
“Tu beduduk ari ngembuan tangkup pengawa tuai ba renggat baruh ti kering enggau integriti,” ku iya maya bejaku ba sebengkah pengerami ditu, empai lama.
Nangkan ke nya, iya madah diri ngarap penghulu enggau kaban iya ngaga langkar (perambu) besai ungkup Labang.
“Nama dikedeka kitai, Labang taun 2030…baka ni kitai deka ngeranchakka agi pemansang enggau pengerembai ba Labang,” ku iya.
Rundi mega madahka Kampung Labang iya nya sebuah genturung pendiau Komuniti Vaie ti bepalan ba Sungai Kemena entara Pasar Sebauh enggau Tubau.
Genturung nya diatu ngembuan begunan klinik pengerai, begunan sekula ti udah diangkatmanah sereta bungkur telekomunikasyen ti baru beoperasyen pun taun tu tadi.
Ba awak ke sama, Rundi madahka perintah diatu benung ngelangkar akses dikena ngemudahka jalai penyambung peranak ke Bintulu.-TVS
