SARATOK, 22 April: Raban pekebun ba sitak Kunsil Nengeri (DUN) Krian diperansang nyereta projek betanam betupi moden ba baruh Ejensi Pemansang Bagi Menua Betong (BDDA) dikena nyungkak mayuh agi penatai pemisi enggau mega ngemudahka pengawa betanam betupi.
Kaban Kunsil Nengeri (ADUN) Krian, Friday Belik madahka, agih belanja khas penyampau RM4 juta udah disediaka dikena negapka agi sektor betanam betupi ba sitak nya.
“Siti agi program ke deka diaduka ba area kitai ditu iya nya ba pasal betanam betupi.
“Sapa kita ti deka nguji enggau orang betanam betupi chara moden tadi kitai enda tentu ngantung tulang baka suba.
“Kitai ulih nitih chara betutup ngena kibong tauka tebuka chara kitai ngereja iya utai nya dikumbai betanam betupi moden.
“Bisi nya disebut fertigasi tauka hidroponik.
“Nyadi taun tu aku udah ngungkupka RM4 juta dikena ngemujurka pengawa betanam betupi moden,” ku iya.
Iya madah munyi nya rambau Pengerami Tuai Begulai enggau Rayat ba Rumah Panjai Matar Sigan Sungai Sebilik Lubok Renit Awik Saratok, kemari.
Tandu iya, pengani ba kandang endur nya ti ngembuan juluk deka nyereta ulih ngerejister dir ba Palan Servis DUN Krian.
Ngelansa pasal pengerami nya, Friday madah Program Tuai Begulai enggau Rayat endang siti pelasar pemadu manah dikena ngulihka timbal sereta ngelala penanggul ke ditapi rayat renggat baruh.
“Baka tu tadi lima iku Tuai Rumah udah bejaku ngayanka sebana diri enggau mansutka penemu pasal pekara ke diguna nembiak redak ba rumah panjai,” ku iya.
Tandu iya, kelimpah ulih ngerapitka kaul, program nya mega ulih meri peluang ngagai pengari rayat nerangka tetiap polisi ti dipejalaika perintah ngagai rayat, tebal agi ba renggat baruh.-TVS
