KUCHING, 21 April: Rumah Sarawak ke nyadi indu opis Kaunsil Seni Sarawak (MSS) endang siti kelai dikena ngempuruka seni enggau budaya pupu bansa di Sarawak.
Tuai Pegawai Eksekutif MSS Dayang Mariana Abang Bolhassan madah nya mega senutuk enggau tuju penumbuh MSS dikena negapka seni enggau budaya di Sarawak dibaruh siti perabung.
“Enti kitai meda ba Rumah Sarawak tu, iya ngempuruka semua bansa di Sarawak baka Melayu, Iban, China, India, Orang Ulu, Bidayuh enggau Melanau.
“Nya nya nyata ngedut kaul antara Kaunsil Seni Sarawak enggau pengemeran seni di Sarawak,” ku iya.
Mariana mansutka jaku nya rambau Pengerami Gempuru Aidilfitri 2024 beserimbai enggau Hari Tebuka Kaunsil Seni Sarawak (MSS) 2024 di Rumah Sarawak, ditu kemari.
Sama bisi datai Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah enggau sapit iya, Datuk Snowdan Lawan sereta sekretari mendam opis menteri nya Datu Sherrina Hussaini.
MSS nyadi siti opis dibaruh Opis Menteri Dagang Temuai, Industri Kreatif enggau Seni Pemerindang Sarawak ditumbuh 1 September 2021 lalu nyadi siti ejensi dikena meransang komuniti Sarawak ngambi bagi ba aktiviti budaya sereta seni.
Penumbuh MSS mega dikena mandangka budaya enggau seni etnik Sarawak nengah bemacham program.
Kelimpah ari nya mega mansut ngelaku, melanja sereta meransang pengawa pelajar sereta pansik pasal seni.
Hari Tebuka MSS 2024 diatur berengkah 19 April sereta diisi enggau bemacham aktiviti baka Simfoni Orkestra Nengeri Sarawak (SONS) Junior, Pakaian Beragam Remaja enggau Explore Rumah Sarawak. – TVS
