SARATOK, 21 April: Sepenyampau RM70 juta tauka 60 peratus agih belanja dibaruh Ejensi Pemansang Bagi Menua Betong (BDDA) di sitak Kunsil Nengeri (DUN) Kalaka deka dikena bejalaika projek betanam betupi.
Kaban Kunsil Nengeri (ADUN) Kalaka Mohd Duri madah, agih belanja nya dikena ngaga baru tauka ngemanah jalai, entali ai enggau pintu ai ba kebun sereta ladang dipenggi raban orang bekebun ba sitak DUN nya.
“Kami ke nyadi pengari rayat (ADUN) endang meri terima kasih ngagai YAB Premier (Sarawak Datuk Patinggi Tan Sri Abang Johari Tun Openg) laban udah ngemendarka bantu nengah BDDA.
“Lebih kurang dalam 60 peratus tauka RM70 juta udah diagihka aku dikena ngemanah jalai kebun laban orang tuai kitai kala bejaku munyi tu enti nadai jalai, nadai parit, enda ibuh bekebun.
“Kebuah munyi nya laban sebarang aja utai ditanam kitai enti nadai parit, nadai jalai raya (utai tanam) nya deka mati,” ku iya.
Iya madah munyi nya ba Pengerami Rumah Tebuka Hari Raya Aidilfitri 2024 ke diatur iya empu ba Diwan SJKC Myn Syn Saratok, ke digulu urung 500 iku temuai, Hari Enam.
Nangkan ke nya, Mohd Duri madah diri deka naka ulih nentuka tikas sosio ekonomi rayat ulih diangkat nengah sekeda projek besai ti deka dipejalaika ba DUN Kalaka.
Tu nyengkaum projek ngaga dua jalai raya ari Rumah Panjai Senyawan ke Taman Muhibbah sepanjai 2.82 kilometer enggau jalai ari Rumah Panjai Lubok Renit nuju ke Nanga Sungai Awik sepanjai 1.5 kilometer diatu dalam proses nyiri perunding projek.
Ngelansa pekara bukai, Mohd Duri meransang mensia mayuh lebih agi ke diau ba pelilih Saratok terus ngetanka semangat beserakup enggau pangan diri.
“Pengerichah Aidilfitri mega sebaka enggau pengerami bukai baka Taun Baru China, enda lama agi kitai deka ngintu Gawai Dayak, Krismas enggau pengerami ke bukai.
“Nya alai, ulah ngusung pangan diri maya Hari Raya ke dikemeran raban Islam enggau adat ngabang dikemeran bansa Dayak siti budaya ari aki ini kitai ke patut terus ditampung rebak baru,” ku iya.
Nangkan ke nya, iya madah rayat di nengeri tu patut guna genap pengerami dikena ngedut kaul enggau pangan diri lalu ulah nya mesti ditan nyentuk ke jemah ila.-TVS
