KUCHING, 20 April: Urung 800 iku pedagang ari mayuh bengkah sektor ekonomi udah nerima penguntung ari turu penyampau RM10 juta ba baruh Program Bumiputera Business Empower Fund (Bumi Bizfund) kenyau taun 2022.
Sapit Premier Sarawak, Datuk Amar Awang Tengah Ali Hasan madahka, pemujur program nya asil ari kerejasama strategik entara Opis Menteri Dagang Antarabansa , Industri enggau Meranakka Puku Sarawak (MINTRED) enggau Balai Dagang enggau Industri Dayak (DCCI).
”DCCI udah ngesan tangkup pengawa beguna dalam nyukung guna kaban sida dikena mulaika pemanah dagang nengah turu tu.
“Nengah kerejasama strategik enggau MINTRED, DCCI udah mujur bejalaika mayuh bengkah program, ngaga kapasiti baka Latih Ngatur Homestay, Latih Makit Digital enggau Latih Fertigasyen di serata Sarawak kenyau taun 2022.
“Program tu meri penguntung ngagai lebih 800 penyereta nyengkaum mayuh bengkah sektor ekonomi lebih agi komuniti menua pesisir,” ku iya.
Awang Tengah mansutka jaku nengah teks jaku iya ke dibacha Sapit Menteri MINTRED, Datuk Dr Malcolm Mussen Lamoh rambau pengawa nutup Program Bumi Bizfund 2024 ba Begunan DCCI kemari.
Bisi RM10 juta udah diagih ungkup Bumi Bizfund rambau bajet nengeri 2022, baka ke udah dipadahka Premier Sarawak, Datuk Patinggi Tan Sri Abang Johari Tun Openg kena 21 Oktober 2021.
Bumi Bizfund iya nya sebuah program ba baruh MINTRED ti meri bantu ungkup Gerempung Dagang Bumiputera.
Geran nya mai tuju dikena mantu Gerempung Dagang Bumiputera napi pasca pandemik Covid-19 nengah program ngangkatmanah dagang seraya ngemudahka penumbuh ‘startup’ baru.-TVS
