SIKU-siku artis ke diaku tebilang enda ulih disukat ari pemayuh lagu tauka album ke udah dipansut.
Penanyi Iban Candy Dylam Jimet, 33 taun madah, dalam industri muzik Iban pemayuh lagu tauka album ke udah digaga nadai mai reti nyema siku-siku penanyi nya puntan dikangau merindang.
“Ba penemu Candy mih nyadi siku penanyi tebilang ukai bepanggai ngagai pemayuh album ke udah digaga tang bepangai ngagai pemayuh kangau tauka pengelaku diri merindang.
“Baka Candy empu, Puji Tuhan chukup mayuh nerima kangau belagu sekalika ba Palan Pemerindang, (program) opis perintah, pengerami sebelah hotel, pengerami Gawai enggau ke bukai nyentuk ke sehari tu,” ku iya.
Lebuh bekunsi resia baka ni ulih terus beretan dalam industri, peranak asal Rumah Panjai Melanjok, Simunjan tu nerangka nyangka ari ulah iya ti seruran gaga enggau kemerah kelimpah enda kelalu kiruh ngagai sebarang isu ke nyadi ngelinggi ngujungka pengawa iya nyadi pemerindang naka tu chukup mujur.
“Resia aku nyadi siku penanyi ke ulih beretan lama dalam industri tu nyangka laban aku mudah begulai enggau sapa-sapa aja enggau aku enda peduli nama jaku orang pasal aku laban aku siku orang ke rindu bekaling tauka semampai dipeda lantang ati,” ku iya.
Candy ke udah tepejuh dalam dunya pemerindang lagu Iban pengelama semilan taun madah munyi nya maya dirandau pengari TVS, apin lama ke udah.
Berengkah nyadi penanyi ba taun 2015, Candy mujur ngerakam dua album penuh diberi nama Enda Nyangka Nuan Nyimpan Pengerindu enggau Kumang Mereti Kelimpah ngasilka 25 buah lagu solo.
Diatu lagu solo pemadu baru ari Candy iya nya berentak dangdut diberi nama Anang Bemain Enggau Ati ditengkebang Ijal Zainal.
Antara lagu bukai ke kala ngangkatka nama Candy dalam industri lagu Iban iya nya Bujang Bebaju Ginggang enggau Di Ketek Aja.-TVS
