KABONG, 20 April: Sebuah kilang beras beungkus RM3.5 juta deka digaga ba Skim Padi Kampung Kaba Saratok.
Kaban Kunsil Nengeri (ADUN) Kalaka Mohd Duri madahka, projek nya dipejalai ba baruh atur Ejensi Pemansang Bagi Menua Betong (BDDA) begulai enggau Opis Betanam Betupi ti dijangka deka berengkah ba taun tu.
“Kami ngungkupka ba dalam BDDA ungkup kilang nya penyampau RM2 juta enggau dikena ngangkatmanah entali ai, jalai enggau ke bukai lebih kurang dalam RM1.5 juta (agi) dalam perambu.
“Kami opis betanam betupi udah ngabas taba enggau aum silik enggau Sapit Premier Datul Amar Douglas Uggah sereta kami melabaka dalam kandang taun tu kitai ulih berengkah bejalaika projek ari sukut tempa tukuh enggau kereja tumu kti ulih dikereja kitai,” ku iya.
Iya mansutka jaku nya pengudah aum pasal Roban Food Festival 2024 ba Opis Pelilih Kabong kemari.
Ku iya, pengawa ngaga kilang proses beras nya betuju dikena ngangkatka baru Kampung Kaba nyadi siti ari tibang padi di nengeri tu kelimpah matak mayuh agi komuniti lokal ngemeranka baru pengawa betanam padi sida.
Ba awak ke sama, Kampung Kaba mega dipilih Kolej Univeristi i-CATS nyadi sebuah kandang menua ngasilka produk pemakai jelu ari rumput napier.-TVS
