KUCHING, 20 April: Siku deriba kerita mayuh guna (MPV) bebadi nyawa, lalu dua iku agi penumpang bakal ba penusah aksiden ke nyadi ba Jalai Raya Pehin Sri Haji Adenan Haji Satem (Jalai FAC) ditu, malam tadi.
Pengari Opis Bomba enggau Penyah Penusah Sarawak madah, ba penusah aksiden kediri empu nya deriba, Lai Nyuk Loi, tepelasit ngagai luar kerita, telih sereta pechah pala.
Lelaki beumur 54 taun nya dikenukuka raban perubat ari Opis Menteri Pengerai udah nadai ba palan penusah nyadi.
“Siku tudah lelaki beumur 66 taun balat telih tepilak jari kiba enggau tekepit. Siku agi tudah indu beumur 25 taun mujur mansutka diri empu ari kerita sereta bisi bakal ba pala,” ku iya nengah siti penerang sehari tu tadi.
Raban bomba nerima kangau urung pukul 8.31 malam enggau ngerah Raban Bomba enggau Penyah Penusah Petra Jaya ngesah palan penusah.
Ngelansa penusah ke sama, Pemangku Tuai Polis Padawan Deputi Superitendan Lim Jaw Shyong madah tudah ke bebadi nyawa iya nya deriba MPV, Lai Nyuk Loi.
“Penusah nyadi maya kerita ke benung ba rantau jalai ari tunga Jalai Sampadi nuju ke Kuching.
“Datai ba Jalai FAC Matang, enda memukai kerita tudah tepawah lalu ensayar nuju parit sepiak kiba jalai sebedau ke bepusin lalu tebelunging tama parit,” ku iya nengah sebengkah penerang.
Ku terang iya, dua iku agi tudah ke bakal udah dianjung berubat ba Wad Emejensi Sepital Besai Sarawak.
Kes agi dipansik nitihka Seksyen 41 (1) Akta Pengangkutan Jalan 1987.-TVS
