KUCHING, 19 April: Program Nupi Chapi di bagi menua Betong deka dikerembai ba baruh Ejensi Pemansang Bagi Menua Betong (BDDA).
Sapit Premier Sarawak Datuk Amar Douglas Uggah Embas madahka, naka ke diatu program nya nerima sambut ke manah pengudah dipejalaika ba estet sawit ke dipenggi Kaunsil Penyerakup Enggau Pengintu Tanah Sarawak (SALCRA) di Roban.
Nitihka rikod sebedau tu, Program Nupi Chapi ke udah bisi diatu dikemansangka siku pengani Rumah Panjai Babu’ Tengah di Debak ti udah mujur mandangka asil.
“Diatu kitai bisi rumah panjai udah nupi kerebau sebedau tu ba Babu Tengah endang sigi bisi nupi kerebau.
“Aku enda ga nemu engka bisi ba endur bukai, laban dia bisi nupi kerebau purih Sarawak empu, lalu maya nya kitai mai purih kerebai ari Australia sereta dibagi ngagai pengani rumah panjai.
“Pengawa nupi nya mujur sekalika purih luar enggau purih lokal laban kitai bulih purih ke lebih besai.
“Pia mega, pemegai taruh mit ke bisi nanam sawit mega ulih ngambi bagi dalam program tu.
“Program ti sigi deka dikerembai ngagai perayat ke bisi ati deka ngaul diri, tang mesti bebendar ngereja pengawa tu,” ku iya.
Iya mansutka jaku nya pengudah bechairmanka Aum Bekaul Enggau Penyeraris Sereta Pengawa Bejalaika Projek BDDA ba Wisma Bapa Malaysia, ditu kemari.
Uggah nerangka, naka diatu ba estet sawit ke dipenggi SALCRA di Roban, bisi 2,000 iku chapi ditupi makai rumput ba endur nya, sebedau ulih dijual ngagai orang ke deka meli chapi.
Tandu iya, program nupi chapi nya siti ari program ke dipejalaika di Betong senutuk enggau juluk deka ngemansangka bagi menua nya nyadi siti hab pemakai di Sarawak.
Ngelansa pekara bukai, Uggah bisi madahka sepenyampau RM82 juta agih belanja udah dikemendar ungkup program sosio ekonomi rayat dibaruh BDDA.
Ku iya, ari penyampau nya sepenyampau RM15.5 juta diperambu dikena ngemujurka sekeda projek ke meri pangka ngagai rayat.
Agih belaja ke chukup besai ku iya diberi seriris enggau juluk perintah ti deka nyendiaka perengkaguna dikena mantu rayat ba sitak BDDA ngambika ngembuan penatai pemisi ke tinggi.
Nya alai, ku iya bala pengari rayat ke ngemataka BDDA ngembuan pengandal ke chukup besai deka meda genap projek ke udah diperambu bejalai enggau mujur ke pemaik rayat.
Sama bisi datai Chairman Komiti Sektor Betanam Betupi BDDA ke mega Kaban Kunsil Nengeri (ADUN) Krian Friday Belik, ADUN Kalaka Mohd Duri, ADUN Beting Maro Razaili Gapor enggau ke bukai.-TVS
