SARATOK, 15 April: Rayat di sitak Kunsil Nengeri (DUN) Krian diatu sama ngasaika buah pemansang sebaka enggau sitak menua bukai ke bisi diarika pengari perintah Gabungan Parti Sarawak (GPS).
Kaban Kunsil Nengeri (ADUN) Krian Friday Belik madah, pekara tu nyata dipeda nengah bemacham projek pemansang ke diperambu deka dikemujur nengah agih belanja RM200 juta ari Ejensi Pemansang Bagi Menua Betong (BDDA).
Projek-projek ke dibaruh BDDA tu deka meri empas positif ngagai sitak DUN Krian lebih agi ngaul pemansang infrastruktur.
“Kitai di Krian tau dikumbai kitai benasit laban kitai ditu bisi pengari rayat ari parti perintah (GPS).
“Nya alai, enti kitai enda mujur (menang PRN) suba tak betik-betik mih kitai (semina) ninga ke orang aja tang seninjik amat diatu BDDA dibantai ngujungka kitai (Krian) pan sama bulih laban bisi pengari dalam perintah.
“Enti kitai nadai pengari baka ni deka enggau orang bekunsika RM200 juta nya sangka aku kitai deka tinggal ari segi pemansang,” ku iya.
Iya madah munyi nya maya bejaku ba Pengerami Ngintu Taun Ke-30 Penumbuh Rumah Panjai Joan di Simpang Ulu Kabo, empai lama.
Friday madah, pekara tu chukup bebida enggau pengari rayat di sitak DUN Kabong enggau Kalaka ti diperati ulih nampung projek pemansang ke dipejalaika sida sebedau tu laban endang dipegai pengari rayat GPS.
Sama bisi ngulu pengerami nya Senator Peter Tinggom.-TVS
