SARATOK, 15 April: Projek ngaga begunan baru Opis Pelilih Mit Nanga Budu ditu deka masuk proses tinda abis laun ujung taun tu.
Kaban Kunsil Nengeri (ADUN) Krian Friday Belik madah, proses mayar pampas tanah ke diteresa projek nya udah dipejalaika raban bekaul.
“Berita manah ba kitai menua ditu iya nya Opis Pelilih Mit Nanga Budu nyau deka belabuh digaga.
“Nya alai, enti bisi opis ke baru ila kitai nguji mai pegawai opis betanam awak ke tetap ba kitai di ulu ditu.
“Pia mega Kaunsil Pelilih patut dibuka pampang ditu di Nanga Budu awak ke nyamai kita bebayarka chukai pintu rumah,” ku iya.
Friday madah munyi nya maya bejaku ba Pengerami Ngintu Taun Ke-30 Rumah Panjai Joan di Simpang Kabo, Hari Enam.
Ku tandu iya, enti udah tembu ila Opis Pelilih Mit Nanga Budu nya deka ngemuntangka perayat ke diatu besemak ngatur pengawa enggau ejensi perintah lalu sida enda ibuh agi jauh ke Pasar Saratok.
Diatu, Opis Pelilih Mit Nanga Budu dibuka sementara ba begunan kuartes perintah.
Projek nya udah dikemendarka nengah pansik setengan penggal dalam Langgur Pemansang Malaysia Lumpar Ke-12 (RM12) dijangka tembu dalam timpuh 18 bulan.-TVS
