KUCHING, 15 April: Pengerami ‘Ramah Tamah Aidilfitri’ 2024 ke diatur ba begunan Kunsil Nengeri (DUN) Sarawak kena Hari Minggu tu tadi nyadi pengingat ke enda ulih dibuai, ku Senator Pele Peter Tinggom.
Ku iya pengasai ati diri chukup sinu lebuh dikangau datai ukai nyadi siku ari raban Kunsil Nengeri ke ngulu pengerami nya.
“Aku berasai beterima kasih ngagai Tuhan laban ulih sama enggau ngintu Hari Raya Aidilfitri 2024.
“Tu mih siti pengingat berega ba aku laban aku udah gawa ditu pengelama 10 taun nyadi Sapit Sekretari lalu udah nya nyadi Sekretari.
“Aku berasai sinu laban aku datai kitu serak tu dikangau laban nyadi Senator lalu ukai agi ketegal nyadi raban DUN.
“Nyadi aku ngarapka DUN terus mansang baka taun-taun sebedau tu,” ku iya.
Pele mansutka jaku nya maya Pengerami Ramah Tamah Aidilfitri DUN Sarawak diatur ditu, empai lama.
Berebak enggau nya, Pele ke mega ex-Sekretari DUN Sarawak ngarapka bala bakih bukai ulih neruska pengawa enggau manah.
Pele, 53 taun asal ari Saratok dipaduk nyadi Senator kena 5 March tu tadi.-TVS
