SARATOK, 15 April: Lebih 90 buah rumah panjai di sitak Kunsil Nengeri (DUN) Krian udah diagihka Projek Transformasyen Menua Pesisir (RTP).
Kaban Kunsil Nengeri (ADUN) Krian Friday Belik madah agih RTP sepenyampau RM10 juta nya kebendar agih belanja ari taun 2022 enggau 2023.
“Dalam timpuh dua taun lebih tu naka ke diatu kitai udah ngungkupka 10 juta RTP ari taun 2022 enggau 2023.
“Taun tu (2024) bedau datai agih nya, nyadi ari 10 juta kitai udah ngampitka 90 lebih buah rumah panjai projek RTP nyengkaum kitai ba Simpang Kabo ditu,” ku iya.
Iya madah munyi nya maya Pengerami Ngintu Taun Ke-30 Penumbuh Rumah Panjai Joan di Simpang Kabo, Hari Enam.
Friday mega meri jami deka nentuka semua rumah panjai ba sitak DUN Krian bela nerima projek RTP diri ungkup musin dudi.
Sitak DUN Krian ngembuan urung 250 buah rumah panjai lalu sistem nyadung projek RTP dipejalaika nitihka peminta sereta guna pengani ke bekaul.-TVS
