BETONG, 13 April: Raban apai indai di menua pesisir bela dilalau mesti meransang anak ngemeratka pelajar ba bidang Sains, Teknologi, Injiniring enggau Matematik (STEM).
Kaban Parlimen Betong Dr Richard Rapu madah, nya chukup beguna nyadika penyikap ngagai sida napi jeman dunya digital kemaya hari tu.
“Kitai nemu (diatu) dunya digital.
“Nya alai, semua pendiau pengidup kitai ke dudi hari ila (bepelasarka teknologi digital).
“Beduduk ari nya, kitai enda tau enda sama-sama nyendiaka diri, meransang bala anak uchu kitai anang enda nurun besekula belajarka penemu sains enggau matematik laban nya ulih (mai) ubah,” ku iya.
Dr Richard mansutka pekara nya maya bejaku ba Pengerami Bejadika Rumah Panjai Baru Nanga Pek ba Debak,kemari.
Nangkan ke nya, iya madah semua ekonomi baru jemah endang bepelasarka sains enggau teknologi.
Beduduk ari nya, mensia mayuh mesti nemu ubah dunya ke dudi hari ila diatu mesti sama nyingkang nitih ubah pemansang dunya, ku iya.
Udah nya, Dr Richard madah program ke deka diatur perintah baka pemansang sekula seruran dikemanah ngambika sekula di pesisir ngembuan perengkaguna ke chukup baka di mengeri.
Ku terang Dr Richard kelimpah ari bidang pelajar rayat di menua pesisir mega patut mayuh penemu tauka penyedar pasal pengerai.
Pengerami bejadika Rumah Panjai Baru Nanga Pek kemari dikemujurka Sapit Premier Sarawak Datuk Amar Douglas Uggah Embas sereta bisi digulu bini iya, Dato Doreen Mayang, Sapit Menteri Nembiak, Lumba enggau Pemansang Dagang Sarawak Dato Gerald Rentap Jabi, Kaban Kunsil Nengeri Krian Friday Belik enggau ke bukai.
Rumah Panjai Baru Nanga Pek bisi 24 pintu berengkah digaga 20 Ogos 2012 sereta tembu penuh dua taun udah nya iya nya kena 15 Julai 2014.-TVS
