BETONG, 12 April: Palan ungkup achara angkat berat Pekit Lumba Malaysia (SUKMA) 2024 ti deka diatur ba Betong kena bulan lapan tu ila engka deka ditukar ngagai palan baru iya nya di Diwan Lumba Tan Sri Datuk Amar Stephen Kalong Ningkan.
Sapit Menteri Nembiak, Lumba enggau Main sereta Pemansang Orang Dagang Sarawak Dato Gerald Rentap Jabu madahka, pekara nya nyadi berindik ari palan asal ti diperambu sebedau tu napi isu teknikal.
“Kami bisi nerima ripot ari Komiti Teknikal, engka deka bisi berubah laban kami nganti pemutus ari Tuai Deligit Teknikal ungkup angkat berat bisi napi penanggul mimit.
“Penanggul nya nyangka ari sukut panggau bedau chukup perengkaguna ke patut.
“Taja pia pekit angkat berat tetap diatur ba Betong sereta kami melaba deka milih Diwan Tan Sri Kalong.
“Tu ukai pemutus aku kediri tang pemutus ari KDT nya empu,” ku iya.
Rentap ke mega Kaban Kunsil Nengeri (ADUN) Layar mansutka pekara nya maya dirandau media pengudah aktiviti Ngabang Hari Raya Aidilfitri ngagai sekeda rumah Tuai Komuniti enggau Tuai Raban Bansa (KMKK) di Betong, kemari.
Ku terang Rentap genap lumba bisi atur teknikal ke mesti dititih.
Nangkan ke nya, iya madah pengawa ngaduka sistem irkon enggau masang wayar ba palan nya bedau berengkah.
Pekara nya beduduk ari sekeda pekara ke patut diperati dulu, lebih agi ke ngaul aspek kos enggau agih belanja ti disediaka.
Kena 22 March tu tadi, Komiti Teknikal SUKMA Sarawak Ke-21 udah ngabas palan asal ba Diwan Panglima Rentap dikena meratika atur nyikap ti dipejalaika ejensi ke bekaul dikena nentuka achara nya bejalai enggau lanchar.
Bisi lapan kategori ti deka dipekitka ungkup achara angkat berat ti dijangka deka matak penatai urung 300 iku atlit enggau pegawai ari 12 nengeri ti nyereta achara nya.-TVS
