BETONG,12 April: Program Bantu Lisin Deriba B2-MyLisin Renggat Parlimen Betong nyelinting 1,200 penyereta ari perayat lokal.
Kaban Parlimen Betong Dr Richard Rapu madahka, penyereta tu tebuka ngagai perayat Malaysia ngaul raban biak tauka nembiak sekula ke beumur 16 taun enggau ke atas sereta orang tuai tauka penerima bantu perintah lebih agi raban B40.
“Kitai nyelinting dalam 1,000 tauka 1,200 berindik ari kapasiti diwan ke deka diguna enggau mega perengkaguna sereta kapasiti ari JPJ.
“Nyadi program tu kitai nyelinting dalam anggar 1,000 tauka 1,200.
“Udah nya, enti sema timbal ke manah ila sereta enda ulih tama dalam raban serak tu kitai minta agi ngagai JPJ barang maya deka datai,” ku iya.
Dr Richard mansutka pekara nya pengudah ngatur pengawa Ngabang Hari Raya Aidilfitri ngagai semilan buah Rumah Tuai Komuniti enggau Tuai Raban Bansa (KMKK) di Betong, kemari.
Ku iya madah, program nya diatur dikena mantu raban nya ngulihka lisin motosikal enggau rega ke baruh.
Ungkup sida ke bisi ati deka nyereta program tu ti keterubah iya diatur di Parlimen Betong ulih ngambi pom penyereta ba tiga palan servis Kunsil Nengeri (ADUN) di Parlimen Betong iya nya Palan Servis ADUN Saribas, Palan Servis ADUN Bukit Saban enggau Palan Servis ADUN Layar.-TVS
