KUCHING, 8 April: Tuai Sekretari Politik ngagai Premier Sarawak, Fazzrudin Abdul Rahman nyerahka ngagai Supreme Kaunsil Gabungan Parti Sarawak (GPS) dikena nentuka status ex- kaban Parti Sarawak Bersatu (PSB) ti nyemilik nyadi Kaban Parti Demokratik Progresif (GPS) sekalika deka diangkat sechara automatik nyadi sebagi ari gempung parti nya.
“Kitai nganti Supreme Kaunsil GPS laban aku pan baru macha ripot berita kemari, kami bedau agi meda penerang rasmi ari kaban supreme kaunsil GPS.
“Nama-nama pan, nya udah ngayanka pengandal PSB enggau inisiatif ti dibai premier kitai enggau perintah GPS, enti amat sida patut nurun ngabas nerangka ngagai rayat enggau komuniti ungkup penerus inisiatif tu ngagai rayat,” ku iya.
Iya mansutka jaku nya rambau aum media pengudah Pengerami Bejadika Semarak Syawal Agro Madani @Medan Niaga Satok, Hari Satu.
Nerang silik pasal penyereta ex- kaban PSB ke dalam PDP, ku iya pekara nya dipeda siti pengerembai ti positif.
“Nitihka proses, aku andal engka PDP deka ngaga ripot ngagai raban tetinggi tauka ‘Council of GPS’ tang kebendar aku meda tu ngayanka pengandal PSB ba inisiatif ke dipejalaika perintah GPS ke sebedau tu dilaban sida.
“Engka sida meda inisiatif enggau polisi kebendar perintah GPS ti amat meri penguntung ke rayat, nya kebuah sida andal enggau nyukung penuh perintah kitai,” ku iya.
Berebak enggau nya, iya ngarap kaban PSB ulih datai ngelawa rayat lalu nerang ngagai komuniti sentang pemanah inisiatif dibai perintah GPS berengkah enggau ketiga-tiga ADUN (PSB).-TVS
