PENANYI lama Iban enggau Kayan, Rosiana Urai madahka orang ke ke ngembuan pemajik sereta pemadas sada nyawa enda nyamin iya ulih beretan lama dalam industri pemerindang.
Kebuah pia ku Urai laban dua pekara nya mesti digembar enggau ulah ke manah sereta nemu nempa pemanah kaul enggau semua orang.
“Aku beterima kasih ngagai pemeri ari Tuhan laban bisi ngembuan vokal, bakat nulis kenyau ari pun suba nyadi nya ngujungka aku ulih beretan ukai ketegal aku landik belagu, vokal aku manah tauka bisi pemajik.
“Pakej iya enti nuan nya bajik nyadi nya bonus lalu resia (beretan lama ba industri) ba aku iya nya nemu nempa kaul enggau orang maya gawa ba dedini endur, beri mih kerejasama.
“Ari segi chara bejaku kitai berandau enggau pengatur.
“Nyema enda setuju enggau rega berunding manah-manah ukai terus ringat nyadi nya enda ulih.
“Enti ulah kitai badas semua orang deka gawa enggau kitai, enti vokal kitai manah pan nyema ulah (tepawir) tentu pengatur enggai bekerejasama enggau kitai,” ku iya.
Penanyi asal ari menua Baram tu mansutka penemu nya lebuh dirandau pengari TVS Saratok bekaul enggau resia baka ni iya ulih meruan dikerindu dalam industri muzik menua tu kenyau ari taun 1989 nyentuk ke diatu.
Urai iya nya siku penyanyi lama ke serebak enggau penanyi baka Cecelia Rosittie, Josphine Jalin, Penghulu Andrewson Ngalai, Johnny Aman, Johnical Sanggam enggau ke bukai.
Lagu kayan keterubah dirikod Urai iya nya diberi nama Ika’ Peluvat Akui suah ditebah ba churung radio dalam taun 1994.-TVS
