SIBURAN, 5 April: Mensia mayuh lebih agi ke diau ba pelilih Siburan dilalau terus ngemeratka pengelikun rumah diri empu nyerumba pengerami Hari Raya Aidilfitri.
Tuai Balai Bomba enggau Penyah Penusah Siburan, Penulung Penguasa Bomba Nazry Mohamat madahka, mensia mayuh mega patut nyeliahka elemen 3L iya nya lupai, lali enggau layap sebedau ninggalka rumah sepanjai musin pengerami tu.
“Mensia mayuh ti deka pulai ke menua diri ngintu 1 Syawal, tentuka pengelikun dapur, perengka nyumai baka ‘regulator’ tauka pala gis dibuka dikena nyeliahka gis pantis lalu ulih ngujungka penusah angus.
“Pia mega, perengka elekterik ti enda dikena, suis patut dichabut ari soket, bela nyeliahka elemen lupai, lali enggau layap,”ku iya madah ngagai TVS apin lama.
Tandu iya, aspek nyeliahka penusah angus iya nya tanggungpengawa begulai sama ngambika penusah angus ba rumah maya musin pengerami ulih diseliahka.
Nitihka rikod, ba taun 2023 pelilih Siburan bisi ngerikodka 14 kes penusah angus struktur.
Naka bulan April taun tu, penyampau nya diperati bisi kusut iya nya semina ngerikodka dua iti kes.-TVS
