SARATOK, 5 April: Pengawa ngaga sapat nagang tanah tusur ba Rumah Panjai Thomas Padat di Itop Awik Saratok deka dipejalaika nengah agih belanja ari Opis Penyangga Penusah Nengeri Sarawak (JPBNS).
Taja pia, Kaban Kunsil Nengeri (ADUN) Krian Friday Belik madah penyampau agih belanja dikena ngaga sapat nya bedau ulih diputuska laban agi nganti ripot ari Opis Kereja Raya (JKR).
“Raban JKR diatu benung berati enggau ngadu pelin nama pekara ke patut digaga udah tu dikena ngemanah rumah panjai nya ngaul tiga tauka empat pintu bilik ke balat rusak.
“Kitai deka meda nama perambu ari Opis Menteri Kereja Raya lalu kitai deka mantaika pemutus ari JKR ngagai opis menteri tauka Komiti Penyanga Penusah Nengeri Sarawak ila,”ku iya.
Iya madah munyi nya maya dirandau media pengudah nemuai ngagai Rumah Panjai Thomas ditu, Hari Empat.
Kena 24 March tu tadi, urung 15 iku pengani datai ari tiga ruang bilik ari Rumah Panjai Thomas Padat di Itop Saratok tebunsa sepengudah dituntung penusah tanah tusur.
Taja pia, ba penusah nadai ngaul sebarang penusah bakal enggau bebadi nyawa.-TVS
