SPAOH, 3 April: Opis Residen Bagi Menua Betong dipinta meresa baru penyampau agih belanja ke patut dikena ngaga rumah baru raban sida ke tasah angus ba sebuah rumah kedai di Nanga Tiga Layar.
Kaban Kunsil Nengeri (ADUN) Bukit Saban Datuk Amar Douglas Uggah Embas madah , tu dikena nentuka Opis Penyaga Penusah Nengeri Sarawak (JPBNS) ulih bejalaika pengawa meri bantu lengkas ngagai sida ke tasah angus.
“Aku udah ngasuh Residen (Betong) meresa pasal bantu ngaga rumah baru laban endang udah bisi dalam polisi Perintah GPS nyendiaka bantu ungkup sida ke angus rumah sekalika nya rumah nyembuah tauka rumah panjai,” ku iya.
Uggah madah munyi nya rambau pejalai ngabas tembawai angus ba sebuah rumah kedai di Nanga Tiga Layar, kemari.
Ku terang Uggah naka tu Perintah Sarawak endang bisi nyendiaka agih belanja dikena mantu ngaga rumah baru ngagai barang sapa rayat di nengeri tu ke dituntung penusah angus maksimum RM70,000.
Ke penerang kena 28 March tu tadi, tiga pengani nyau deka bebadi nyawa pengudah sebuah kedai renchit ke alai sida diau di Rumah Adal Nanga Tiga Layar angus.
Kebuah enggau penyampau pengerugi ketegal penusah angus ke nyadi pukul 10.30 pagi nya agi dipansik raban ke bekaul.-TVS
