SPAOH, 3 April: Raban bekaul lebih agi raban Polis Diraja Malaysia (PDRM) dipinta mansik enggau neritka atur ngagai raban ke enda mereti iya nya ngachau enggau enchuri kereban elektronik ba tiang telekomunikasyen.
Sapit Premier Sarawak Datuk Amar Douglas Uggah Embas madah diri chukup asa pengudah nemu pekara nya bisi nyadi lalu ngujungka ngenusah mensia mayuh.
“Aku ngarap iya nya raban polis bejalaika pansik lengkas enggau neritka atur ngagai raban ke enda mereti.
“Kedua aku nesau mensia mayuh minta sida sama nyaga kereban ba tiang telekomunikasyen laban perengkaguna mensia mayuh.
“Nya alai, aku ngarapka pekara nya nadai agi nyadi dudi hari lalu minta bala polis matau dikena nentuka pekara ke enda disadang nyadi,” ku iya.
Uggah madah munyi nya lebuh meri timbal pasal penyadi kes enchuri kereban elektronik ke majak ngirauka ati ba sitak DUN Bukit Saban, kemari.
Nangkan ke nya, Uggah madah diri minta kerejasama mensia mayuh ngambika sama besaup matau tiang telekomunikasyen ke berimbai enggau rumah diri dikena nentuka penyadi ke enda disadang nya nyadi baru.
Ke penerang, bisi tiga kes enchuri nyadi ba tiang telekomunikasyen di Bukit Saban iya nya ba Tiang Telekomunikasyen Pelikoi, Tiang Telekomunikasyen Nanga Tiga enggau Tiang Telekomunikasyen Nanga Lawih Mujau.-TVS