SPAOH, 3 April: Pemisi Palan GIATMARA Spaoh udah tu ila dikearap deka meri mayuh pemaik ngagai raban nembiak lebih agi sida ke benung begigaka pengawa.
Sapit Premier Sarawak Datuk Amar Douglas Uggah Embas madah pemisi palan nya chukup manah ngambika sida ke nembiak bulih latih enggau pengelandik dalam bidang industri ngaga begunan enggau elektronik.
“Tu endang siti ari program ke dipejalaika ba sitak Bukit Saban enggau Betong iya nya deka nyendiaka latih pengelandik ngagai raban nembiak ke benung begigaka pengawa.
“Ari pemisi palan tu iya deka ulih ngelatih mayuh agi raban nembiak dalam mayuh bidang pengelandik nitihka guna nengeri Sarawak.
“Kitai endang begunaka raban landik dalam bidang elektronik enggau bidang ngaga begunan enggau pengelandik ke bukai,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya pengudah ngabas Projek Ngemanah Begunan Opis Betanam Betupi Spaoh ti deka dikemanah nyadi Palan GIATMARA Spaoh ditu, kemari.
Ku terang Uggah, nadai kebuah raban nembiak ke diau besemak enda ngerebut peluang gulihka pengandik nya.
Palan GIATMARA Spaoh ke deka dibuka dibaruh kemata Ejensi Pemansang Bagi Menua Betong (BDDA) deka nyendiaka kus bekaul enggau ngaga begunan baka Kus Nusun Bata enggau Kus Elektronik.-TVS
